އަހަރީ އާންމު ޖަލްސާގެ ދަޢުވަތު

އަލްފާޟިލް ޢާމިރު މަންޞޫރަކީ މިހާރުވެސް އެސްޓީއޯގެ ބޯޑު ޗެއަރމަންކަން އަދާކުރައްވަމުންދާ ފަރާތެވެ. އަލްފާޟިލް ޢާމިރު މަންޞޫރު އެސްޓީއޯގެ ބޯޑަށް ޢައްޔަންކުރައްވާފައި ވަނީ 5 ޑިސެމްބަރ 2023 ގައެވެ. ޢާމިރު ވަނީ ޓާރލެކް ސްޓޭޓް ޔުނިވަރސިޓީއިން މާސްޓަރ އޮފް ބިޒްނަސް އެޑްމިނިސްޓްރޭޝަންގެ ސަނަދު ހާސިލްކުރައްވާފައެވެ. އަދި މީގެ އިތުރުން، އޭނާ ވަނީ ސިންގަޕޯރ މެނޭޖްމަންޓް ޔުނިވާސިޓީއިން އެގްޒެކެޓިވް ޑިޕްލޮމާ އިން ޑިރެކްޓަރޝިޕް ހާސިލްކުރައްވާފައެވެ. އަދި މެލޭޝިޔާގެ އިންސްޓިޓިއުޓް އޮފް އެންޓަރޕްރައިޒް ރިސްކް ޕްރެކްޓިޝަނަރސް އިން ރިސްކް ޑިރެކްޓަރ ޕްރޮގްރާމްވެސް ފުރިހަމަކުރައްވާފައެވެ. އަލްފާޟިލް ޢާމިރު މަންޞޫރު ވަނީ 37 އަށްވުރެ ގިނަ އަހަރު، ވިޔަފާރީގެ ދާއިރާގައި އަމަލީ ތަޖުރިބާ ހާސިލްކުރައްވާފައެވެ. އަލްފާޟިލް ޢާމިރު މަންޞޫރަކީ މިވަގުތު ލިލީ އިންޓަރނޭޝަނަލް ޕްރައިވެޓް ލިމިޓެޑް، ކާޕޭޑިއަމް މޯލްޑިވްސް ޕްރައިވެޓް ލިމިޓެޑް، ގްރޭޕް އެކްސްޕެކްޓޭޝަން ޕްރައިވެޓް ލިމިޓެޑް، ހުރުވަޅި ބީޗް ރިސޯޓް އިންވެސްޓްމަންޓް ޕްރައިވެޓް ލިމިޓެޑް، ސޯލްޓް އެންޑް ރޮކް ރިއަލް އެސްޓޭޓް ޕްރައިވެޓް ލިމިޓެޑް، މެރިކަލްޗަރ މޯލްޑިވްސް ޕްރައިވެޓް ލިމިޓެޑް އަދި އެޗް.އައި.އެމް މެނޭޖްމަންޓް ކޮމްޕެނީ ސަރވިސަސް ޕްރައިވެޓް ލިމިޓެޑްގެ މެނޭޖިންގ ޑިރެކްޓަރެވެ. ހަމަމިއާއެކު، އޭނާ ދަނީ މޯލްޑިވްސް ލިވަބޯޑު އެސޯސިއޭޝަންގެ އެގްޒެކެޓިވް ބޯޑު މެންބަރުކަން އަދި ނޮވެމްބަރ 2023 އިން ފެށިގެން ނެޝަނަލް ބޯޓިންގ އެސޯސިއޭޝަންގެ ރައީސްގެ މަޤާމްވެސް އަދާކުރައްވަމުންނެވެ. މީގެ އިތުރުން، 2012 އިން 2019 ވަނަ އަހަރާއި ހަމައަށް އަލްފާޟިލް ޢާމިރު މަންޞޫރު ވަނީ އެސްޓީއޯގެ ބޯޑު ޑިރެކްޓަރކަންވެސް އަދާކުރައްވާފައެވެ. ޢާމިރު ތަމްސީލްކުރައްވަނީ ސަރުކާރުގެ 919،869 ހިއްސާއެވެ. އަދި އޭނާގެ އަމިއްލަ ހިއްސާއެއް ކުންފުނީގައި ނުވެއެވެ.

އަލްފާޟިލް ޝިމާދު އިބްރާހިމް އެންމެ ފުރަތަމަ ބޯޑަށް ޢައްޔަންކުރެވިފައި ވަނީ 16 މެއި 2019 ގައެވެ. އަދި ކުންފުނީގެ މެނޭޖިންގ ޑިރެކްޓަރުގެ މަޤާމަށް ޢައްޔަންކުރެވިފައި ވަނީ 28 ނޮވެމްބަރ 2023 ގައެވެ. އަލްފާޟިލް ޝިމާދު އިބްރާހިމް ވަނީ މެލޭޝިއާގެ އިންޓަރނެޝަނަލް އިސްލާމިކް ޔުނިވަރސިޓީން ބެޗްލަރ އޮފް އެކައުންޓިންގ ޑިގްރީ ހާސިލްކުރައްވާފައެވެ. އަދި މީގެ އިތުރުން އޭނާއަކީ ޗާޓަރޑް އެކައުންޓަންޓެއް ވެސްމެއެވެ. އޭނާއަކީ އެކައުންޓިންގ ދާއިރާގައި 20 އަަށްވުރެއް ގިނަ އަހަރުގެ ތަޖުރިބާ ހާސިލްކުރައްވާފައިވާ ފަރާތެކެވެ. ޝިމާދަކީ އެސް.އެފް.ޖީ ކޯޕަރޭޓް ސަރވިސަސް ޕްރައިވެޓް ލިމިޓެޑް އަދި ލިސާ މޯލްޑިވްސް ޕްރައިވެޓް ލިމިޓެޑްގެ ޑިރެކްޓަރއެކެވެ. އަދި ހަމަމިއާއެކު މޯލްޑިވްސް އިންޑަސްޓްރިއަލް ޑިވަލޮޕްމަންޓް ފްރީޒޯންގެ މެނޭޖިންގ ޑިރެކްޓަރވެސްމެއެވެ. މީގެ އިތުރުން ޝިމާދު ވަނީ މޯލްޑިވްސް އިސްލާމިކް ބޭންކް، މޯލްޑިވްސް ޓޫރިޒަމް ޑިވަލޮޕްމަންޓް ކޯޕަރޭޝަން، ތިލަފުށި ކޯޕަރޭޝަން އަދި އަޕަރ ސައުތު ޔުޓިލިޓީސްގެ ބޯޑު ޑިރެކްޓަރކަންވެސް އަދާކުރައްވާފައެވެ. އަދި ވިލާ ގްރޫޕްގެ ޗީފް ފައިނޭންޝަލް އޮފިސަރކަމާއި، މޯލްޑިވްސް އިސްލާމިކް ބޭންކްގެ ހެޑް އޮފް ފައިނޭންސްކަމާއި މިނިސްޓްރީ އޮފް ފިނޭންސް އެންޑް ޓްރެޜަރީގެ ޗީފް ފައިނޭންސް އެގްޒެކެޓިވްކަންވެސް ފުރިހަމަކުރައްވާފައިވެއެވެ. ޝިމާދު ތަމްސީލްކުރައްވަނީ ސަރުކާރުގެ 919،869 ހިއްސާއެވެ. އަދި އޭނާއަކީ އަމިއްލަގޮތުން ކުންފުނީގެ 55 ހިއްސާގެ ވެރިފަރާތެވެ.

އަލްފާޟިލް މުޙައްމަދު ނިޒާމް ބޯޑަށް ޢައްޔަންކުރެވިފައިވަނީ 18 މާރިޗް 2021 ގައެވެ. އޭނާއަކީ މިވަގުތު ކުންފުނީގެ ޗީފް ފައިނޭންޝަލް އޮފިސަރ ވެސްމެއެވެ. ނިޒާމް އެސްޓީއޯއާއި ގުޅިވަޑައިގެންފައިވަނީ 2010 ވަނަ އަހަރުއެވެ. ނިޒާމް ވަނީ އެސްޓީއޯގެ ޕްރޮކިއުމަންޓް ޑިޕާރޓްމަންޓްގެ އިސްވެރިޔާގެ ދައުރުގެ އިތުރުން ކުންފުނީގެ ޗީފް ރިސްކު އޮފިސަރ، ސީނިއަރ ފައިނޭންސް މެނޭޖަރ އަދި ސީނިއަރ އިންފޮމޭޝަން ސިސްޓަމްސް މެނޭޖަރކަންވެސް އަދާކުރައްވާފައެވެ. ނިޒާމްއަކީ މިވަގުތު ފިއުލް ސަޕްލައިޒް މޯލްޑިވްސް ޕްރައިވެޓް ލިމިޓެޑް އަދި ރޭސުޓް މޯލްޑިވްސް ސިމެންޓް ޕްރައިވެޓް ލިމިޓެޑްގެ ޗެއަރމަންއެވެ. ހަމަމިއާއެކު، ނިޒާމްއަކީ މޯލްޑިވްސް ނެޝަނަލް އޮއިލް ކޮމްޕެނީ ލިމިޓެޑް އަދި އެސްޓީއޯ މޯލްޑިވްސް ސިންގަޕޯރ ކުންފުނީގެ ބޯޑު މެންބަރެއްވެސްމެއެވެ. އަދި މީގެ ކުރިން އޭނާ ވަނީ އެލައިޑް އިންޝުއަރެންސް ކުންފުނީގެ ޗެއަރމަންކަން، މޯލްޑިވްސް ސްޓޭޓް ޝިޕިންގ ކޮމްޕެނީ، މޯލްޑިވްސް އިންޑަލްޓްރިއަލް ފިޝަރީސް ކޮމްޕެނީ ލިމިޓެޑް އަދި މޯލްޑިވްސް ސްޓޮކް އެކްސްޗޭންޖް އާއި މޯލްޑިވްސް ސްޓޮކް ޑިޕޮޒިޓަރީގައިވެސް ބޯޑު މެންބަރުކަން އަދާކުރައްވާފައެވެ. ނިޒާމް ވަނީ އޮސްޓްރޭލިޔާގެ ބަލަރަޓް ޔުނިވަރސިޓީގެ މާސްޓަރ އިން ބިޒްނަސް އެޑްމިނިސްޓްރޭޝަން (ފައިނޭންސް މެނޭޖްމަންޓް) ފުރިހަމަކުރައްވާފައެވެ. އަދި އިނގިރޭސިވިލާތުގެ ޔުނިވަރސިޓީ އޮފް އީސްޓް ލަންޑަން އިން ބެޗެލަރސް ޑިގްރީ އޮފް އާރޓްސް (އޮނަރސް) އިން ފައިނޭންސް އެންޑް އެކައުންޓިން ހާސިލްކުރައްވާފައެވެ. މީގެ އިތުރުން އޭނާއަކީ ޗަރޓަޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (FCMA, CGMA) ގެ ފެލޯ މެންބަރެކެވެ. ނިޒާމަކީ އިންސްޓިޓިއުޓް އޮފް އެންޓަރޕްރައިޒް ރިސްކު ޕްރެކްޓިޝަނަރޒްގެ ޕްރޮފެޝަނަލް މެންބަރެއް އަދި ސަރޓިފައިޑް އެންޓަރޕްރައިޒް ރިސްކު އެޑްވައިޒަރއެކެވެ. ހަމަމިއާއެކު، އެސް.އޭ.ޕީ ފައިނޭންސް އެންޑް ކޮންޓްރޯލިން މޮޑިއުލްގެ ސަރޓިފައިޑް އެސޯސިއޭޓް ކޮންސަލްޓަންޓެކެވެ. ނިޒާމް ތަމްސީލްކުރައްވަނީ ސަރުކާރުގެ 919,869 ހިއްސާއެވެ. އަދި ކުންފުނީގައި އަމިއްލަ ހިއްސާއެއް ނޯވެއެވެ.

އަލްފާޟިލް މުޙައްމަދު މުރާދު އެސްޓީއޯ ބޯޑަށް ޢައްޔަންކުރެވިފައިވަނީ 5 ޑިސެމްބަރ 2023 ގައެވެ. މުރާދު ވަނީ ކެމްބްރިޖް ކޮލެޖް އޮފް ބިސްނަސް އެންޑް މެނޭޖްމަންޓް އިން މާސްޓަރ އޮފް ބިސްނަސް އެޑްމިނިސްޓްރޭޝަން ހާސިލްކުރައްވާފައެވެ. ހަމަމިއާއެކު، އެކަޑަމީ އޮފް ޑިޒައިން އިން ބީޓެކްގެ ފުރަތަމަ ޑިޕްލޮމާގެ އިތުރުން ބީޓެކް ހަޔަރ ނޭޝަނަލް ޑިޕްލޮމާ ހާސިލްކުރައްވާފައެވެ. އޭނާ އެސްޓީއޯއާއި ގުޅިވަޑައިގެންނެވީ 1998 ވަނަ އަހަރުގައެވެ. އެގޮތުން، މުރާދު ވަނީ އެސްޓީއޯގެ ސްޓޯރ އޮޕަރޭޝްންސް މެނޭޖަރުކަމާއި، ހޯމް އިމްޕްރޫވްމަންޓް މެނޭޖަރުކަމުގެ އިތުރުން ސާރވިސް ސެންޓަރ މެނޭޖަރުގެ މަޤާމްވެސް އަދާކުރައްވާފައެވެ. އަދި 2013 ވަނަ އަހަރުން ފެށިގެން 2021 ވަނަ އަހަރާއި ހަމައަށް އެސްޓީއޯގެ ޖެނެރަލް މެނޭޖަރުގެ މަޤާމްވެސް ފުރުއްވާފައިވެއެވެ. ހަމަމިއާއެކު، އެލައިޑް އިންސުއަރެންސް ކޮންޕެނީ އޮފް ދަ މޯލްޑިވްސް ޕްރައިވެޓް ލިމިޓެޑް، މޯލްޑިވް ގޭސް ޕްރައިވެޓް ލިމިޓެޑް އަދި މޯލްޑިވްސް ސްޓްރަކްޗަރަލް ޕްރޮޑަކްޓްސް ޕްރައިވެޓް ލިމިޓެޑް ކުންފުނީގެ ބޯޑު މެންބަރުކަންވެސް އަދާކުރައްވާފައިވެއެވެ. މުރާދު ތަމްސީލްކުރައްވަނީ ސަރުކާރުގެ 919,869 ހިއްސާއެވެ. އަދި ކުންފުނީގައި އަމިއްލަ ހިއްސާއެއް ނޯވެއެވެ.

އަލްފާޟިލާ ރީޝާ ޢަބްދުލްމުންޢިމް އެސްޓީއޯގެ ބޯޑަށް ޢައްޔަންކުރެވިފައި ވަނީ 28 ޖެނުއަރީ 2024 ގައެވެ. ރީޝާ ވަނީ އިންޑިޔާގެ ޔުނިވަރސިޓީ އޮފް މައިސޫރުން މާސްޓަރ އޮފް ބިސްނަސް އެޑްމިނިސްޓްރޭޝަން ހާސިލްކުރައްވާ، ސޭލްސް އަދި މާކެޓިންގެ ދާއިރާއިން ސްޕެޝަލައިޒްވެވަޑައިގެންފައެވެ. އަދި އިންޑިޔާގެ ޖޭ.އެސް.އެސް ކޮލެޖުން ބެޗެލަރ އޮފް ބިޒްނަސް މެނޭޖްމަންޓް އަދި ޑިޕްލޮމާ އިން ފޮރިން ޓްރޭޑް ހާސިލްކުރައްވާފައިވެއެވެ. މީގެ އިތުރުން އަލްފާޟިލާ ރީޝާ ޢަބްދުލްމުންޢިމް ވަނީ ޔޫ.ކޭގެ ޗަރޓަޑް އިންސްޓިޓިއުޓް އޮފް ޕަރސަނަލް ޑިވަލޮޕްމަންޓިން އެސޯސިއޭޓް ޑިޕްލޮމާ އިން އޮގަނައިޒޭޝަނަލް ލަރނިންގ އެންޑް ޑިވަލޮޕްމަންޓް ހާސިލްކުރައްވާފައެވެ. އޭނާއަކީ އައިލެންޑް އޭވިއޭޝަން ސަރވިސަސް ލިމިޓެޑްގެ ލަރނިންގ އެންޑް ޑިވެލޮޕްމަންޓް ފަންކްޝަންގެ ސީނިއަރ މެނޭޖަރއެވެ. މީގެ އިތުރު ރީޝާ ވަނީ އެ ކުންފުނީގެ ކޮމަރޝަލް އަދި ހިއުމަން ރިސޯސް ދާއިރާގެ ގިނަ މަޤާމްތަކެއް ފުރުއްވާފައެވެ. ހަމަމިއާއެކު، ފައުންޑޭޝަން ކޯސްތަކުން ފެށިގެން މާސްޓަރ ކޯސްތަކާއި ހަމައަށް ދަރިވަރުންނަށް ކިޔަވައިދެއްވުމުގައި މެޕްސް ކޮލެޖް، ވިލާ ކޮލެޖް، ކްލިކް ކޮލެޖް، އެވިޑް ކޮލެޖް އަދި މާލެ ބިޒްނަސް ސްކޫލްގައި ލެކްޗަރަރކަންވެސް ކުރައްވާފައިވެއެވެ. ރީޝާއަކީ ސިންގަޕޯރ ޗެޕްޓަރ އޮފް ވިމެން އިން އޭވިއޭޝަން އިންޓަރނޭޝަނަލް އަދި މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލްގެ މެންބަރެކެވެ. ރީޝާ ތަމްސީލްކުރައްވަނީ ސަރުކާރުގެ 919,869 ހިއްސާއެވެ. އަދި ކުންފުނީގައި އަމިއްލަ ހިއްސާއެއް ނޯވެއެވެ.

އަލްއުސްތާޛު ދާނިޝް މުޙައްމަދު އަމީން އެސްޓީއޯގެ ބޯޑަށް ޢައްޔަންކުރެވިފައިވަނީ 18 ޑިސެމްބަރ 2023 ގައެވެ. ދާނިޝް ވަނީ އިނގިރޭސިވިލާތުގެ ޔުނިވާރސިޓީ އޮފް ވާރވިކްއިން ބެޗެލާރސް ޑިގްރީ އިން ލޯ (ހޮނާރސް) ހާސިލްކުރައްވާފައެވެ. މީގެ އިތުރުން، ދާނިޝްވަނީ ޔުނިވާސިޓީ އޮފް ލޯ އިންކޯޕަރޭޓިންގ ދަ ކޮލެޖް އޮފް ލޯ އިން، ލީގަލް ޕްރެކްޓިސް ކޯސް ނިންމަވާ ސޮލިސައިޓާރއަކަށް ކޮލިފައިވެވަޑައިގެންފައެވެ. އަދި، އޭނާއަކީ ޗާޓަރޑް އިންސްޓިޓިއުޓް އޮފް އާރބިޓްރޭޓާރސްގެ މެންބަރެއް ވެސްމެއެވެ. ދާނިޝް ވަޒީފާ އަދާކުރައްވަނީ އެސް.އެޗް.ސީ ލޯ އެންޑް ޓެކްސް ފާރމްގެ ލޯޔަރެއްގެ ގޮތުގައެވެ. އެގޮތުން ޤާނޫނީ ދާއިރާގައި އޭނާ ހާއްސަވެފައިވަނީ ބޭންކިންގ، ފައިނޭންސް، ޓޫރިޒަމް އަދި އިންފްރާންސްޓްރަކްޗަރ އިންނެވެ. މީގެ އިތުރުން، 2023 ވަނަ އަހަރު ގްލޯބަލް އައި.އެފް.އެލް.އާރ އަދި ޗެމްބަރސް އެންޑް ޕަރޓްނަރޒް އިން ދާނިޝްއަށް ވަނީ ރައިސިންގ ސްޓަރ ޕާރޓްނަރެއްގެ ރޭންކް ލިބިވަޑައިގަންނަވާފައެވެ. ހަމައެހެންމެ، 2019 އަދި 2023 ވަނަ އަހަރު އޭޝިޔާ ލޯ އިން މަރޖަރސް އެންޑް އެކުއިޒިޝަން ޕްރެކްޓިސް އިން ދާނިޝްވަނީ ނޯޓަބަލް ޕްރެކްޓިޝަނަރ އެއް ގޮތުގައި ރޭންކް ކުރެވިފައެވެ. އޭނާ ވަނީ ވިލާ ކޮލެޖްގެ ވިޒިޓިންގ ލެކްޗަރާއެއްގެ މަޤާމްވެސް އަދާކުރައްވާފައިވެއެވެ. އަލްއުސްތާޛު ދާނިޝް މުޙައްމަދު އަމީން ތަމްސީލްކުރައްވަނީ ސަރުކާރުގެ 919,869 ހިއްސާއެވެ. އަދި ކުންފުނީގައި އަމިއްލަ ހިއްސާއެއް ނޯވެއެވެ.